Qafqaz Müsəlmanları İdarəsi 20 Yanvar faciəsi ilə bağlı işin beynəlxalq məhkəməyə verilməsi üçün Azərbaycan Parlamentinə müraciət qəbul edib (ƏLAVƏ OLUNUB)

RED. əlav.: başlıq dəyişdirilib, son üç abzas əlavə olunub

Azərbaycan, Bakı, 18 yanvar / Trend , müxbir S.Ağayeva/

Qafqaz müsəlmanlarının dini lideri Şeyxülislam Hacı Allahşükür Paşazadə hesab edir ki, 20 Yanvar faciəsinin günahkarları Haaqa tribunalı qarşısında dayanmalıdır.

"Biz 20 Yanvar hadisələrinin araşdırılması üzrə komissiya yaratmağa çalışırıq. Bu komissiya, Mixail Qorbaçov başda olmaqla, faciənin günahkarlarının beynəlxalq tribunal qarşısında dayanmalarına nail olmalıdır", - Qafqaz Müsəlmanları İdarəsinin sədri Allahşükür Paşazadə bazar ertəsi QMİ-də 20 Yanvar faciəsinin 20 illiyinə həsr edilən konfransda deyib.

1990-cı il yanvarın 19-dan 20-nə keçən gecə, əvvəlcədən fövqəladə vəziyyət elan edilmədən, Sovet ordusu Azərbaycana qarşı hərbi əməlliyatlara başlayıb. Faciə zamanı 132 insan öldürülüb, onlardan 117-si azərbaycanlıdır. 744 adam ağır xəsarət alıb, 4 nəfər itkin düşüb, 400 nəfər həbs edilib. Yanvarın 20-də fövqəladə vəziyyət elan ediləndən sonra daha 21 nəfər qətlə yetirilib. Fövqəladə vəziyyət elan edilməmiş rayonlarda (Neftçala, Lənkəran) 26 nəfər qətlə yetirilib.

Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 1990-cı il 20 Yanvarında ölkəmizə qarşı ərazi iddiaları irəli sürən Ermənistanın təcavüzkar hərəkətlərindən və keçmiş SSRİ rəhbərliyinin onlara havadarlığından hiddətlənən, Bakının küçələrinə və meydanlarına çıxaraq buna öz qəti etirazını bildirən geniş xalq kütlələrinə qarşı sovet ordusunun döyüş hissələrinin yeridilməsi Azərbaycanda misli görünməmiş faciəyə gətirib çıxardı. Həmin faciəli günlərdə öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucaldılar.

Böyük itkilərlə, günahsız insanların qətli ilə nəticələnən 20 Yanvar faciəsi, Qorbaçov başda olmaqla, cinayətkar imperiya rəhbərliyinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan xalqımızın mübarizliyini, əyilməzliyini, məğrurluğunu bir daha nümayiş etdirdi.

Məhz bunun nəticəsində, uzun illərdən bəri arzusunda olduğumuz müstəqilliyə qovuşduq və ölkəmiz suverenlik əldə etdi. Bu qanlı hadisələrdən illər keçsə də, xalqımız o müdhiş gecəni daim xatırlayır, bu faciəni törədənlərə öz dərin nifrətini bildirir. Xalqımızın Qan Yaddaşında əbədi yaşayacaq 20 Yanvar faciəsi respublikamızda hər il ümumxalq hüzn günü kimi geniş qeyd edilir.

Konfransda din xadimləri, Azərbaycanda dini icmaların rəhbərləri, ölkə parlamentinin üzvləri iştirak edirlər.

Qafqaz Müsəlmanları İdarəsi 20 Yanvar faciəsi ilə bağlı işin Haaqa beynəlxalq tribunalına verilməsi üçün Azərbaycan Parlamentinə müraciət qəbul edib.

"Azərbaycanın Milli Məclisi faciənin iştirakçıları və günahkarlarının məsuliyyətə cəlb edilməsi üçün beynəlxalq təşkilatlar qarşısında xahişlə çıxış etməlidir", - müraciətdə deyilir.

"Azərbaycan xalqı faciənin iştirakçılarını və günahkarlarını - Qorbaçovu və onun həmkarlarını məhkəməyə cəlb etmək hüququna malikdir", - müraciətdə deyilir.

Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az

Trend-in ən mühüm və maraqlı xəbərlərini "Telegram"da izləyin