Azərbaycan, Bakı, 21 yanvar / Trend , muxbir K.Zərbalıyeva /
Azərbaycanda ötən il əcnəbilər və vətəndaşlığı olmayan şəxslərlə bağlanan nikahların sayı artıb.
Ədliyyə Nazirliyinin Vətəndaşlıq Vəziyyəti Aktlarının Reyestri Xidmətindən cümə axşamı Trend -a verilən məlumata görə, ötən il Azərbaycanda qeydə alınan 78 min 73 nikahdan 2221-də tərəflərdən biri əcnəbi və ya vətəndaşlığı olmayan şəxslər olub.
Xidmətdən bildirilib ki, 2008-ci illə müqayisədə belə nikahların sayı 366 fakt artıb. Belə ki, 2008-ci ildə əcnəbilər və vətəndaşlığı olmayan şəxslərlə 1855 nikah bağlanıb.
Ümumilikdə ötən il respublikada nikahların sayında 1929 fakt azalma müşahidə olunub. Belə ki, 2008-ci ildə Azərbaycanda 80002 nikah qeydə alınmışdı.
Ötən il respublika üzrə 7789 nikahın pozulması faktı (boşanma) qeydə alınıb. 2008-ci illə müqayisədə ötən il boşanmalar 125 fakt azalıb. Bir tərəfi əcnəbilər olan boşanmaların sayı 2008-ci illə müqayisədə 33 fakt artaraq 81 təşkil edib.
Qeyri-rəsmi məlumatlara görə, Azərbaycan vətəndaşlarının nikaha girdiyi əcnəbilər İran, Almaniya, İsrail, ABŞ, Böyük Britaniya, Pakistan, Əfqanıstan, İsveç, Birləşmiş Ərəb Əmirlikləri, Hindistan, Çin, Türkiyə, Rusiya, Gürcüstan, Səudiyyə Ərəbistanının vətəndaşlarıdır.