Azərbaycan, Bakı, 05 mart / Trend , müxbir H.Bağırov/
Azərbaycanda iş adamını qətlə yetirməkdə ittiham olunan mütəşəkkil dəstənin məhkəməsi başlayıb.
Trend -un məlumatına görə, bu gün Ağır Cinayətlərə Dair İşlər üzrə Məhkəmədə Bakının Xətai rayonunda qızıl mağazasının sahibini qətlə yetirməkdə ittiham olunan Naxçıvan Muxtar Respublikasının Culfa rayon sakinləri - Fərrux Babasoy, Heydər Zöhrəliyev, Azər Məmmədov və Murad Məmmədovun cinayət işi üzrə məhkəmənin hazırlıq iclası keçirilib. Məhkəmə baxışı martın 16-na təyin edilib.
Təqsirləndirilən şəxslər 2009-cu il noyabrın 1-də Bakının Xətai rayonunda yaşayan Mədinə Əhmədovanı tamah məqsədilə qətlə yetiriblər.
Müəyyən edilib ki, bir müddət əvvəl Zöhrəliyev Əhmədovadan 1600 ABŞ dolları dəyərində nisyə qızıl-zinət əşyaları alıb. Oktyabrın 31-i axşam saat 21.00 radələrində Heydər və Fərrux tanışları Azər və Muradla Mədinəgilə gəlib pulu yubadacaqları barədə üzürxahlıq ediblər. Heydər daha sonra dostları ilə Mədinəni hədələyərək ondan pul tələb etməyə başlayıb. Qadının onları ələ verə biləcəyindən qorxan cinayətkarlar onu öldürmək qərarına gəliblər. Fərrux qadına çoxsaylı bıçaq zərbələri vuraraq qətlə yetirib. Cinayətkarlar mərhumun mənzilindən 300 ABŞ dolları və mobil telefonu götürərək hadisə yerindən qaçıblar.
Təqsirləndirilən şəxslər Cinayət Məcəlləsinin xuliqanlıq niyyəti ilə adamöldürmə (120.2.2), xüsusi amansızlıqla və ya ümümi təhlükəli üsulla adamöldürmə (120.2.4), (tamah məqsədilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə qəsdən adamöldürmə (120.2.5), quldurluq, hədə-qorxu ilə tələb etmə, terrorçuluq və ya banditizmlə əlaqədar adamöldürmə (120.2.11) maddələri ilə ittiham edilirlər.
