Azərbaycan, Bakı, 11 may /Trend, müxbir H.Bağırov/
İrandan Azərbaycana qaçaqmalçılıq yolu ilə narkotik vasitə gətirməkdə ittiham olunan şəxslərə hökm oxunub.
Trend-in məlumatına görə, bu gün Ağır Cinayətlərə Dair İşlər Üzrə Məhkəmənin hökmü ilə İran vətəndaşı Qulamrza Rəhman Acar, Azərbaycan vətəndaşları Ədalət Hüseynov, Mənsur Ağayev, Seyfulla Mehbalıyev 15 il və Əhməd Səfərov isə 12 il müddətinə azadlıqdan məhrum ediliblər.
Təqsirləndirilən şəxslər Cinayət Məcəlləsinin qanunsuz olaraq qabaqcadan əlbir olan bir qrup şəxs tərəfindən və ya mütəşəkkil dəstə tərəfindən, külli miqdarda narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma (234.4.1, 234.4.3), qaçaqmalçılıq (206.4) maddələri ilə ittiham olunublar.
Təqsirləndirilənlər 2009-cu il yanvarın 6-da Dövlət Gömrük Komitəsinin Astara rayon şöbəsinin əməkdaşları tərəfindən həbs ediliblər.