Azərbaycan, Bakı, 15 iyul /Trend, müxbir M. Əliyev/
Bakıda sentyabrın 28-dən 30-dək "Üçqat və çoxqat birləşmələr üzrə17-ci beynəlxalq konfrans" (İSPMC-17) keçiriləcək. Bu barədə Azərbaycan Milli Elmlər Akademiyasının yaydığı məlumatda bildirilir.
Konfransın təşkilatçıları AMEA Fizika İnstitutu və Yaponiyanın Osaka Universitetidir.
1976-cı ildən başlayaraq, hər iki ildən bir keçirilən konfransda dünyanın qabaqcıl ölkələrindən 150-dək nümayəndə iştirak edəcək.
Konfransda dinləniləcək məruzələrin tezisləri ingilis dilində sentyabrın 28-dək qəbul ediləcək və məruzələr ingilis dilində dinləniləcək. Konfransda dinləniləcək ən yaxşı məruzələr dünyanın aparıcı elmi jurnallarında dərc ediləcək.