Azərbaycan, Bakı, 28 iyul /Trend, müxbir T.Hacıyev/
Qafqaz Müsəlmanları İdarəsinin nizamnaməsinə bəzi dəyişikliklər edilməsi labüddür. Dəyişikliklər yaxın vaxtlarda ediləcək. Trend-in məlumatına görə, bunu cümə axşamı QMİ-də Ramazan ayı ilə bağlı keçirilən konfransda Dini Qurumlarla İş üzrə Dövlət Komitəsinin sədri Hidayət Orucov deyib.
"QMİ yeni nizamnaməsini icmalara göndərəcək. İcmaların QMİ-yə tabeçiliyi məsələsi yeni qanunda aydın göstərilib. Yəni QMİ-yə yeni səlahiyyətlər verilib", - Orucov bildirib.
Onun sözlərinə görə, komitə bir müddət öncə icmaların qeydiyyatını dayandırıb. "Biz qanuna dəyişikliklərin gözlənildiyini bilirdik və qeydiyyat ona görə dayandırılmışdı. Ona görə də 219 dini icmanın işinə QMİ-nin təqdimatı ilə komitədə baxılır", - komitə sədri qeyd edib.
O əlavə edib ki, yeni qanunla bağlı icma təsisçilərinin sayı 10 nəfərdən 50-yə qaldırılıb.
Orucov deyib ki, indiyə kimi 520 İslam dini icması qeydiyyatdan keçib. Bunlara qeydiyyat vərəqəsi təqdim olunub, nizamnaməsi təsdiq olunub. Qanuna əsasən, yerli icmaların nizamnamələrinə dəyişiklik etməyə ehtiyac yoxdur.