Azərbaycan, Bakı, 5 dekabr /Trend, müxbir İ.İsabalayeva/
Azərbaycan Təhsil Nazirliyi 2011/2012-ci dərs ilində ümumtəhsil məktəblərində yoxlama və buraxılış imtahanlarının keçirilmə tarixlərini açıqlayıb. Nazirlikdən bazar ertəsi Trend-ə verilən məlumata görə, ümumtəhsil məktəblərində ümumi orta və tam orta təhsil səviyyələri üzrə yoxlama imtahanları gələn il 28 yanvar - 15 aprel tarixlərində keçiriləcək.
Ümumtəhsil məktəblərində ümumi orta və tam orta təhsil səviyyələri üzrə buraxılış imtahanları gələn il 2 iyun - 23 iyun tarixlərində, peşə liseylərində tam orta təhsil səviyyəsi üzrə yoxlama imtahanları fevralın 25-də, buraxılış imtahanları isə aprelin 24-də olacaq.
Ümumtəhsil məktəblərində ümumi orta və tam orta təhsil səviyyələri üzrə yoxlama və buraxılış imtahanları 9 bölgə üzrə keçiriləcək.
2011/2012-ci dərs ilində ümumi və tam orta təhsil səviyyələri üzrə yoxlama və buraxılış imtahanlarının keçirilməsi üçün artıq respublika ümumtəhsil məktəblərinin IX və XI sinif şagirdlərinin məlumat bazası yaradılır.