Azərbaycan, Bakı, 3 mart / Trend müxbir M.Əliyev/
Tələbə Qəbulu üzrə Dövlət Komissiyası (TQDK) martın 4-də cari tədris ili üçün ali təhsil müəssisələrinin magistraturalarına qəbul imtahanının birinci mərhələsini keçirəcək.
Trend-in məlumatına görə, bu barədə TQDK mətbuat xidmətindən bildirilib.
İmtahan Bakı, Naxçıvan, Gəncə və Lənkəran şəhərlərində aparılacaq.
Ərizələrin qəbulu internet vasitəsilə fevralın 8-dən 18-dək aparılıb və imtahanda iştirak etmək üçün 18019 bakalavr ərizə verib. Onlardan 15825 nəfəri Azərbaycan bölməsi, 2194 nəfəri rus bölməsi üzrə imtahan verəcək. Ərizə verənlərin 8459 nəfəri oğlan, 9560 nəfəri isə qızlardır.
Bakalavrlardan 10031 nəfəri 2012-ci ilin məzunlarıdır.
İmtahanda iştirak etmək üçün bakalavrlar fevralın 27-dən etibarən elektron ərizələrinə daxil olaraq "İmtahana buraxılış vərəqəsi"ni çap edib götürürlər. Orada göstərilən ünvanda və tarixdə imtahanda iştirak etmək üçün bakalavrlar "İmtahana buraxılış vərəqəsi"ni və şəxsiyyəti təsdiq edən sənədin əslini imtahana mütləq gətirməlidirlər.
Qəbul imtahanı Bakı şəhərində 25, Naxçıvanda 1, Gəncədə 3, Lənkəranda 1 binada keçiriləcək. Bakıda 15168, Naxçıvanda 603, Gəncədə 1976, Lənkəranda isə 272 bakalavrın imtahan verəcəyi gözlənilir.
İmtahanın idarə olunması üçün 124 imtahan rəhbəri, 1328 nəzarətçi-müəllim cəlb olunacaqdır.
Bütün bölgələrdə qəbul imtahanının gedişini TQDK-da akkreditasiyadan keçmiş 40-dan çox KİV nümayəndəsi müşahidə edəcəkdir.
İmtahan bütün binalarda eyni vaxtda - saat 13:00-da başlanır və sualların cavablandırılmasına 2 saat 30 dəqiqə vaxt ayrılır.
Bakalavrlara ümumi intellekt səviyyəsinin (məntiqi təfəkkür) yoxlanılması üzrə 50, xarici dil üzrə 25 və informatika fənni üzrə 25 test tapşırığı təqdim olunur.
Azərbaycanda magistraturaya qəbul imtahanları 2005-ci ildən etibarən TQDK tərəfindən keçilir.