Azərbaycan, Bakı, 18 iyun /Trend, müxbir İ.İsabalayeva/
Kür çayının aşağı axınında suyun səviyyəsində artım müşahidə olunub.
Ekologiya və Təbii Sərvətlər Nazirliyinin mətbuat xidmətindən bazar ertəsi Trend-ə verilən məlumata görə, iyunun 14-dən başlayaraq Surra məntəqəsində suyun səviyyəsində 27 sm, Şirvanda 26 sm, Salyanda 20 sm, Bankədə 18 sm, Araz çayının Novruzlu məntəqəsində isə 30 sm artım olub.
İyunun 17-də yağan yağışlarla əlaqədar Kür çayının Qıraqkəsəmən məntəqəsində suyun səviyyəsində 10 sm artım müşahidə olunub. Lakin iyunun 18-də səviyyə 7 sm azalıb. Hazırda məntəqədə su sərfi 156 m3/san olmaqla, ongünlük normanın 26 faizini təşkil edir. 2011-ci ildə isə bu rəqəm 3 dəfə çox olmaqla 457 m3/san və ongünlük normanın 77 faizini təşkil edib.
Hazırda Kür çayının Surra məntəqəsində suyun səviyyəsi 380 sm (2011-ci il iyunun 18-də 673 sm), Şirvanda 242 sm (2011-ci il iyunun 18-də 583 sm), Salyanda 203 sm (2011-ci il iyunun 18-də 568 sm), Bankədə 235 sm (2011-ci il iyunun 18-də 351 sm), Araz çayının Novruzlu məntəqəsində isə 100 sm (2011-ci il iyunun 18-də 415 sm) təşkil edir.
İyunun 18-də Böyük Qafqazın çaylarında sululuq ongünlük normanın 60-110, Kiçik Qafqazın çaylarında 55-85, Lənkəran-Astara bölgəsi çaylarında 50-110, Naxçıvan MR çaylarında isə normanın 10-15 faizini təşkil edir.