Azərbaycan, Bakı, 22 iyun /Trend, müxbir İ.İsabalayeva/
Azərbaycanda 2013-2014-cü tədris ilindən baza ali tibb təhsili səviyyəsində tibbi-biologiya və tibbi-profilaktika istiqamətləri üzrə rezidenturaya qəbul imtahanları fənlərinin tərkibində dəyişiklər ediləcək.
Tələbə Qəbulu üzrə Dövlət Komissiyasından (TQDK) cümə günü Trend-ə verilən məlumata görə, hər iki istiqamətin baza fənləri sırasına "İnsan fiziologiyası" və "Patoloji fiziologiya" fənləri, tibbi-biologiya istiqamətinin ixtisas fənləri sırasına "Genetika" fənni, tibbi-profilaktika istiqamətinin ixtisas fənləri sırasına isə "Yoluxucu xəstəliklər" fənni əlavə ediləcək.
Rezidenturaya daxil olmaq üçün tibbi-biologiya istiqaməti üzrə baza fənləri "Biokimya", "Mikrobiologiya", "İnsan fiziologiyası" və "Patoloji fiziologiya", ixtisas fənləri "Klinik biokimya" və "Genetika", tibbi-profilaktika istiqaməti üzrə baza fənləri "Biokimya", "Mikrobiologiya", "İnsan fiziologiyası", "Patololoji fiziologiya", ixtisas fənləri isə "Gigiyena", "Epidemiologiya" və "Yoluxucu xəstəliklər" olacaq.