Azərbaycan, Bakı, 7 mart /Trend, müxbir İ.İzzət/
Bakı yol polisi qadınları mükafatlandırıb.
Bakı Şəhər Dövlət Yol Polisi İdarəsinin bölmə rəisi Vaqif Əsədov Trend-ə bildirib ki, yol polisi əməkdaşları 8 Mart - Beynəlxalq Qadınlar Günü münasibətilə keçirdikləri aksiyada yol hərəkəti qaydalarını pozan, sənədlərində problem olan qadın sürücülərə cərimə əvəzinə gül dəstəsi və hədiyyələr veriblər.
Aksiya şəhərin mərkəzi küçə və prospektlərində həyata keçirilib.
Əsədov bildirib ki, sabah isə 8 Mart - Beynəlxaq Qadınlar Günü paytaxt ərazisində "Nümunəvi qadın sürücü" devizi altında ənənəvi aksiya keçiriləcək. Aksiya zamanı "Yol hərəkəti haqqında" qanunun tələblərinə uyğun hərəkət edən qadın sürücülərə mükafatlar təqdim ediləcək.
"Bank of Baku"-dan isə Trend-ə bildiriblər ki, qarşıdan gələn 8 Mart Beynəlxalq Qadınlar günü ilə əlaqədar "Bank of Baku" Bakı Şəhər Dövlət Yol Polisi ilə birgə aksiya keçirir.
Aksiya çərçivəsində martın 7 və 8-i "Bank of Baku" və DYP tərəfindən xanım sürücülərə hədiyyələr paketi təqdim edilir. Paytaxt Bakının müxtəlif küçə və prospektlərində saxlanılan zərif cinsin nümayəndələrinə " Bank of Baku"-dan pulsuz, aktiv olmayan Bolkart kredit kartı və "İdeal" mağazalar şəbəkəsində alış-veriş üçün 20 manatlıq hədiyyə kuponu verilir.
"Bank of Baku" və DYP nümayəndələrinin aksiyası zamanı xanım sürücülərə yüzlərlə hədiyyə təqdim edilib. Hədiyyə edilmiş Bolkart-ı aktivləşdirmək üçün xanımlara "Bank of Baku"-nun Baş İdarəsi və ya istənilən filialına tək şəxsiyyət vəsiqəsi ilə müraciət etmək yetərlidir.
Xatırladaq ki, bu gün Bolkart kredit kartı vasitəsilə ölkəmizin 600-dən çox tanınmış geyim, parfümeriya, kompüter, mobil telefon, məişət texnikası və mebel mağazalarında, habelə restoran, supermarket və digər ticarət obyektlərində istifadə etmək olar. İdeal hədiyyə kuponu ilə "İdeal" mağazalar şəbəkəsində dəbli ətriyyat məhsullarını almaq olar.
"Bank of Baku" bütün Azərbaycan xanımlarını təbrik edir, həmişə gözəl və təravətli qalmalarını arzulayır.
