Azərbaycan, Bakı, 2 aprel /Trend, müxbir İ.İsabalayeva/
Səhiyyə Nazirliyinin Dərman Vasitələrinin Analitik Ekspertiza Mərkəzinin Dərmanların Keyfiyyətinə Nəzarət şöbəsi aptek təşkilatlarında reydlərə başlayıb.
Nazirlikdən çərşənbə axşamı Trend-ə verilən məlumata görə, reydlər Səhiyyə Nazirliyinin 21.12.2009-cu il tarixli 172 nömrəli əmri ilə təsdiq edilmiş "Aptek təşkilatlarından dərman vasitələrinin buraxılması qaydaları"nın yerinə yetirilməsinə nəzarətin daha da gücləndirilməsi məqsədilə həyata keçirilir.
Aprelin 1-dən başlanan yoxlamalarda Səhiyyə Nazirliyinin təsdiq etdiyi vahid resept blankında buraxılacaq dərman vasitələrini reseptsiz qaydada satan aptek təşkilatı rəhbərləri barəsində qanunvericiliyə müvafiq tədbirlər görüləcək.