Azərbaycan, Bakı, 24 aprel /Trend, müxbir İ.İsabalayeva/
Sabahdan Azərbaycanda hava mülayimləşəcək, temperatur bir neçə dərəcə yüksələcək. Bu barədə Trend-ə Ekologiya və Təbii Sərvətlər Nazirliyinin Milli Hidrometeorologiya Departamentindən məlumat verilib.
Məlumata görə, aprelin 25-də Bakıda və Abşeron yarımadasında havanın dəyişkən buludlu olacağı, arabir tutulacağı gözlənilir. Gecə və səhər Bakıda və Abşeron yarımadasının bəzi yerlərində qısamüddətli az yağış yağacaq. Mülayim cənub-qərb küləyi əsəcək.
Bakıda gecə 6-10, gündüz 15-20 dərəcə isti olacaq.
Azərbaycanın rayonlarında isə aprelin 25-də hava əsasən yağmursuz olacaq, ayrı-ayrı yerlərdə duman olacaq, mülayim qərb küləyi əsəcək. Gecə 5-10, gündüz 20-25, bəzi yerlərdə 27 dərəcə isti olacağı gözlənilir. Dağlarda gecə 1 dərəcə şaxtadan 4 dərəcəyədək isti, yüksək dağlıq ərazilərdə gecə 9-14 dərəcə şaxta, gündüz 5-10, bəzi yerlərdə 15 dərəcəyədək isti olacağı gözlənilir.
Məlumata görə, ümumiyyətlə yaxın 2-3 gün ərzində Azərbaycan ərazisində temperatur getdikcə yüksələcək.
Qeyd edək ki, son 10 gündə Azərbaycanda qeyri-sabit hava şəraiti hökm sürür. Temperatur illik normadan 2-3 dərəcə aşağıdır.