Azərbaycan, Bakı, 29 aprel /Trend, müxbir İ.İsabalayeva/
Azərbaycanda bələdiyyələr tərəfindən elmi-tədqiqat institutları yaradıla bilər.
Milli Məclisdən bazar ertəsi Trend-ə verilən məlumata görə, bu məsələ yeni hazırlanan "Elm siyasəti haqqında" qanun layihəsində öz əksini tapıb.
Layihəyə görə, dövlət elmi-tədqiqat institutunun təsisçisi hökumətdir. Qeyri-dövlət elmi-tədqiqat institutunu bələdiyyələr, fiziki və ya hüquqi şəxslər (dövlət və özünüidarə orqanları istisna olmaqla) təsis edə bilər.
Dövlət elmi-tədqiqat institutunun əsas idarəetmə orqanı onun elmi şurasıdır. Qeyri-dövlət elmi-tədqiqat institutunun idarəedilməsi onların təsis sənədləri ilə müəyyən edilir.
Layihədə qeyd edilib ki, ali təhsil müəssisəsinə müvafiq icra hakimiyyəti orqanı tərəfindən "Tədqiqat universiteti" statusu verilə bilər.