Azərbaycan, Bakı, 9 iyul /Trend, müxbir İlhamə İsabalayeva/
Ana ölümü ilə bağlı hər konkret halın səbəbləri araşdırılır. Trend Səhiyyə Nazirliyinin rəsmi mətbu orqanı olan "Tibb" qəzetinə istinadən məlumat verir ki, bunu Azərbaycanın səhiyyə naziri Oqtay Şirəliyev kollegiya iclasında çıxışı zamanı deyib.
Nazir qeyd edib ki, bu ilin 5 ayı ərzində ölkəmizdə 63 minə qədər doğuş olub: "Təəssüf ki, ana ölümləri də baş verib. Hər bir belə hadisə bizim üçün faciədir. Hər konkret halın səbəbləri araşdırılır, ana ölümlərinin tamamilə qarşısının alınması üçün müvafiq tədbirlər görülür".
Səhiyyə naziri bu il Prezident İlham Əliyevin təşəbbüsü ilə əhalinin profilaktik müayinələrinin həyata keçirildiyini diqqətə çatdırıb. Həmin müddət ərzində 5 milyon 240 min insanın profilaktik müayinələrlə əhatə edildiyini, onlardan 200 min nəfərdən artıq pasiyentdə müxtəlif xəstəliklərin aşkarlandığını bildirib, belə şəxslərin ambulator və ya stasionar müalicəyə cəlb olunduğunu vurğulayıb.
Nazir bu ilin yanvar-may ayları ərzində ambulator-poliklinik şəbəkəyə ümumilikdə 25 milyon müraciətin daxil olduğunu, 400 minə qədər insanın müxtəlif xəstəxanalarda müalicə edildiyini deyib.