...

Azərbaycan və Türkiyə alimləri kosmos və astronomiya sahəsində birgə tədqiqat aparacaqlar (FOTO)

Cəmiyyət Materials 19 May 2015 16:38 (UTC +04:00)
Azərbaycan və Türkiyə alimlərinin kosmos və astronomiya tədqiqatları sahəsində birgə fundamental-tətbiqi layihələrinin dəstəklənməsi barədə razılıq əldə edilib.
Azərbaycan və Türkiyə alimləri kosmos və astronomiya sahəsində birgə tədqiqat aparacaqlar (FOTO)

Azərbaycan, Bakı, 19 may /Trend, müxbir İlhamə İsabalayeva/

Azərbaycan və Türkiyə alimlərinin kosmos və astronomiya tədqiqatları sahəsində birgə fundamental-tətbiqi layihələrinin dəstəklənməsi barədə razılıq əldə edilib.

Elmin İnkişafı Fondundan Trend-ə verilən məlumata görə, bu gün Azərbaycan Respublikasının Prezidenti yanında Elmin İnkişafı Fondunda (EİF) Türkiyə Elmi və Texnoloji Tədqiqat Şurasının (Türkiye Bilimsel ve Teknolojik Araştırma Kurumu - TÜBİTAK) Kosmos Texnologiyaları Araşdırma İnstitutunun (Uzay Teknolojileri Araştırma Enstitüsü - TÜBİTAK UZAY) təmsilçiləri ilə ikitərəfli birgə iclas keçirilib.

İclasda qeyd olunub ki, Elmin İnkişafı Fondu Azərbaycan üçün kosmos tədqiqatları sahəsində kadr hazırlığı məsələsinə xüsusi diqqət yetirir. Bu məqsədlə artıq EİF-in "Mobillik qrantı" hesabına bir gənc mütəxəssis bu ilin əvvəlində TÜBİTAK UZAY-da 1 aylıq təcrübə keçib. Bu ənənənin gələcəkdə də davam etdirilməsi qərara alınıb. Tərəflər birgə elmi tədbirlərin keçirilməsi barədə də razılığa gəliblər.

20 may tarixində isə "Azərkosmos" ASC-də Elmin İnkişafı Fondu və TÜBİTAK UZAY daxil olmaqla üçtərəfli iclas keçiriləcək.

Yaxın günlərdə Elmin İnkişafı Fondu ilə TÜBİTAK arasında elm və texnologiya sahəsində əməkdaşlıq üzrə beynəlxalq saziş imzalanacaq.

Regionun nüfuzlu qurumlarından biri olan TÜBİTAK 1963-cü ildə yaradılıb və Türkiyədə təbiət elmləri sahəsində fundamental və tətbiqi xarakterli tədqiqatları dəstəkləmək və xüsusilə də gənc alim və mütəxəssisləri bu tədqiqatlara cəlb etmək funksiyalarını yerinə yetirir. TÜBİTAK nəzdində Marmara Tədqiqat Mərkəzi, Çukurova Müasir Əkinçilik Texnologiyaları Tədqiqat İnstitutu, Müdafiə Sənayesi Tədqiqat və İşləmə İnstitutu, Türkiyə Sənaye İdarəetmə İnstitutu, TEKSEB və Texnopark, Fundamental Elmlər Tədqiqat İnstitutu, Milli Elektronik və Kriptoloji Tədqiqat İnstitutu, Milli Metrologiya İnstitutu, Kosmos Texnologiyaları Araşdırma İnstitutu (TÜBİTAK UZAY) fəaliyyət göstərir.

Bu gün TÜBİTAK UZAY 12 müxtəlif tədqiqat qrupuna, ən son texnoloji vasitələrə, modern təchizata və yüksək səviyyəli alim və mühəndis heyətinə malik olmaqla Türkiyə daxilində və regional layihələrdə, həmçinin NATO, EUREKA və Dünya Bankı kimi təşkilatlarla əlaqəli bir çox beynəlxalq araşdırma layihələrində uğurla iştirak edir.

Məqalədə:
Xəbər lenti

Xəbər lenti