Bakı. Elçin Mehdiyev - Trend:
Bir sıra ölkələrdə vətəndaşlıq almaq istəyən əcnəbilər qarşısında həmin ölkədə hərbi xidmətdən keçmək tələbi qoyulur.
Milli Məclisin deputatı Məlahət İbrahimqızı Azərbaycanda belə bir tələbin qoyulmasını məqsədəuyğun hesab etmir.
Millət vəkili Trend-ə bildirib ki, Azərbaycanın vətəndaşlıq almaq istəyənlərin hərbi xidmət keçməsinə ehtiyacı yoxdur: "Azərbaycanın kifayət qədər gəncləri var ki, orduda xidmət edirlər. Digər tərəfdən də Azərbaycan kütləvi şəkildə insanları vətəndaşlığa qəbul etmir ki, bu tələbin qoyulmasına zərurət yaransın".
Milli Məclisin deputatı Siyavuş Novruzov da bu tələbin gündəmə gətirilməsinin tərəfdarı deyil.
S.Novruzov Trend-ə bildirib ki, Azərbaycanda vətəndaşlığa qəbul edilənlərin sayı çox deyil: "Onların da bir hissəsi yaşlı nəslin nümayəndələridir, yaşları hərbi xidmət keçməyə imkan vermir və s. Azərbaycan vətəndaşlığına qəbul edilənlərin bir hissəsinin yaşı ordu üçün müvafiq ola bilər ki, bu da orduda hər hansı dəyişikliyə səbəb ola bilməz".
Hərbi ekspert Rəşad Süleymanov da Azərbaycanda vətəndaşlıq almaq istəyən əcnəbilər qarşısında bu cür şərtin qoyulmasına ehtiyac görmür: "Bu gün Azərbaycanın kifayət qədər insan resursu var. Regiondakı digər ölkələrlə müqayisədə Azərbaycan böyük səfərbərlik ehtiyatına malikdir. Hətta cəbhədəki son döyüş əməliyyatlarında çağırışçılardan ibarət ordumuz iştirak edirdi və bir müddət də bu əməliyyatları səfərbərlik elan etmədən həyata keçirmək mümkün idi. Ona görə də əcnəbilərin Azərbaycan ordusuna cəlb edilməsinə ehtiyac olduğunu düşünmürəm".
R.Süleymanov əlavə edib ki, Azərbaycan vətəndaşlığı alandan sonra həmin əcnəbilərə dövlətin bir vətəndaşı olaraq Konstitusiyada müəyyən olunmuş vətəndaşların bütün hüquq və azadlıqları bərabər şəkildə şamil olunur: "Vətəndaşlıq almış əcnəbilərin Azərbaycan Silahlı Qüvvələrində və qanunvericilikdə nəzərdə tutulmuş digər hərbi birləşmələrdə xidmət etməsi bu kontekstdə həyata keçirilir".