...

Yüksəkixtisaslı həkim briqadaları regionlarda əhalinin pulsuz müayinəsinə başlayıb

Cəmiyyət Materials 23 Fevral 2018 14:29 (UTC +04:00)
Əhalinin tibbi müayinələrinin təşkili üçün Səhiyyə Nazirliyinin sərəncamı ilə yaradılan yüksəkixtisaslı həkim briqadaları artıq regionlarda xidmət göstərməyə başlayıblar.
Yüksəkixtisaslı həkim briqadaları regionlarda əhalinin pulsuz müayinəsinə başlayıb

Bakı. İlhamə İsabalayeva - Trend:

Əhalinin tibbi müayinələrinin təşkili üçün Səhiyyə Nazirliyinin sərəncamı ilə yaradılan yüksəkixtisaslı həkim briqadaları artıq regionlarda xidmət göstərməyə başlayıblar.

Səhiyyə Nazirliyindən Trend-ə verilən məlumata görə, səhiyyə nazirinin müavini Nigar Əliyeva “Azərbaycan Respublikası əhalisinin tibbi müayinələrdən keçirilməsi üçün mütəxəssislərin ezamiyyəti haqqında” sərəncam imzalayıb.

Sərəncama əsasən, əhiyyə Nazirliyinin 30.01.2018-ci il tarixli sərəncamının icrası ilə əlaqədar bölgələrdə əhalinin tibbi müayinələrdən keçirilməsini təmin etmək məqsədi ilə yüksəkixtisaslı mütəxəssislər regionlara ezam olunurlar.

Ezam edilənlər arasında Akademik Zərifə Əliyeva adına Milli Oftalmologiya Mərkəzinin, Akademik M.Mirqasımov adına Respublika Klinik Xəstəxanasının, M.A.Topçubaşov adına Elmi Cərrahiyyə Mərkəzinin, Respublika Perinatal Mərkəzinin, Kliniki Tibbi Mərkəzin, Respublika Endokrinoloji Mərkəzin, Akademik C.M.Abdullayev adına Elmi-Tədqiqat Kardiologiya İnstitutunun, Doğum evlərinin, Qadın Məsləhətxanalarının və digər tibb müəssisələrinin mütəxəssisləri daxil ediliblər.

Qeyd edək ki, Azərbaycan Respublikası Prezidentinin tapşırığı ilə 12 fevral – 12 may tarixlərində Səhiyyə Nazirliyinin tabeliyində olan tibb müəssisələrində əhalinin tibbi müayinələri keçirilir. Ölkə başçısının tapşırığının icrası məqsədi ilə səhiyyə nazirinin müavini Nigar Əliyeva “Azərbaycan Respublikası əhalisinin tibbi müayinələrdən keçirilməsi barədə” 30.01.2018-ci il tarixli sərəncam imzalayıb.

Respublikanın şəhər və rayonlarının tibb idarə və müəssisələrinin rəhbərlərinə əhalinin tibbi müayinələrdən keçirilməsinin icrasını şəxsi nəzarətə götürmək tapşırılır.

Artıq 4-cü ildir ki, Səhiyyə Nazirliyi tərəfindən əhalinin tibbi müayinəsi keçirilir. Əhali arasında keçirilən profilaktik tibbi müayinələr patoloji halların, müxtəlif xəstəliklərin risk faktorlarının erkən aşkarlanması məqsədi daşıyır.

Xəstəliklər aşkar olunduğu halda pasiyentlər yerlərdə, zərurət yarandığı halda isə Bakı şəhərində və bölgələrdə fəaliyyət göstərən ixtisaslaşdırılmış tibb müəssisələrində əlavə müayinə və müalicəyə cəlb olunacaqlar.

2017-ci ilin göstəricilərinə görə respublika üzrə müayinədən keçirilmiş şəxslərdən 2041388 nəfəri əlavə müayinələrə cəlb edilmiş, 68427 nəfəri dispanser nəzarətinə alınmış, 27059 nəfəri hospitalizasiya olunmuşdur.

Yaşayış ərazisi üzrə tibb müəssisəsinə vaxtında müraciət edin və profilaktik tibbi müayinədən keçin.

Xəbər lenti

Xəbər lenti