...

Heydər Əliyev Mərkəzində Yana Melikayeva və Askar Abdrazakovun konserti keçirilib (FOTO/VİDEO)

Cəmiyyət Materials 2 İyun 2018 14:38 (UTC +04:00)
İyunun 1-də Heydər Əliyev Mərkəzində Rusiyanın tanınmış opera müğənniləri Yana Melikayeva və Askar Abdrazakovun konserti keçirilib.
Heydər Əliyev Mərkəzində Yana Melikayeva və Askar Abdrazakovun konserti keçirilib (FOTO/VİDEO)

Bakı. Trend:

İyunun 1-də Heydər Əliyev Mərkəzində Rusiyanın tanınmış opera müğənniləri Yana Melikayeva və Askar Abdrazakovun konserti keçirilib.

Heydər Əliyev Fondundan Trend-ə verilən məlumata görə, tanınmış ifaçıları Əməkdar artist Fuad İbrahimovun dirijorluğu ilə Üzeyir Hacıbəyli adına Azərbaycan Dövlət Simfonik Orkestri müşayiət edib.

Yana Melikayeva və Askar Abdrazakov tamaşaçılara müxtəlif operalardan ariyalar, romanslar təqdim ediblər.

Konsert proqramında Mixail Qlinkanın “Ruslan və Lüdmila” operasından üvertura, Şarl Qunonun “Faust” operasından Mefistofelin kupletləri, Volfqanq Amadey Motsartın “Don Juan” operasından Don Juan və Tserlinanın dueti, Jorj Bizenin “Karmen” operasından Xabaneranın ariyası, “Segidilya”, Sergey Raxmaninovun “Aleko” operasından Alekonun kavatinası ifa olunub.

Müğənnilər, həmçinin Vinçentso di Kyaranın “İspan bolerosu”, Aqustin Laranın “Qranada”, Aleksandra Paxmutovanın “Tı moya melodiya”, “Bremen musiqiçiləri” filmindən Gennadi Qladkovun “Luç solntsa zolotoqo” mahnılarını təqdim ediblər.

Konsertdə Azərbaycan bəstəkarları Üzeyir Hacıbəyovun “Sənsiz” romansı, Tofiq Quliyevin “Dobroye utro, moy Azerbaydjan” və “Gecə serenadası” mahnıları da ifa olunub.

1 iyun – Uşaqların Beynəlxalq Müdafiəsi Gününə təsadüf edən konsert proqramında Yana Melikayeva və Askar Abdrazakov səhnəni Azərbaycan Dövlət Uşaq Filarmoniyasının Uşaq Xor Kapellası ilə bölüşüblər. Onlar “Elektronikanın macəraları” filmindən mahnı təqdim ediblər.

Unikal səs və təkrarsız ifanın harmoniya təşkil etdiyi konsert proqramı Xalq artisti Müslüm Maqomayevin məşhur “Azərbaycan” mahnısı ilə başa çatıb.

Məqalədə:
Xəbər lenti

Xəbər lenti