...

“Yüksəliş” müsabiqəsi final mərhələsinin açılış mərasimi baş tutub (FOTO)

Cəmiyyət Materials 16 İyul 2022 17:00 (UTC +04:00)
“Yüksəliş” müsabiqəsi final mərhələsinin açılış mərasimi baş tutub (FOTO)

Bakı. Trend:

16 iyul tarixində “Bakı Ekspo Mərkəzi”ndə “Yüksəliş” müsabiqəsinin final mərhələsinin açılış mərasimi baş tutub. Açılış mərasimində müsabiqənin Təşkilat Komitəsinin sədri, Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, Təşkilat Komitəsinin üzvlərindən Azərbaycan Respublikasının iqtisadiyyat naziri Mikayıl Cabbarov, təhsil naziri Emin Əmrullayev iştirak ediblər. Gənclər və idman nazirinin müavini, İşçi Qrupunun rəhbəri Fərhad Hacıyevin çıxışı ilə açıq elan olunan tədbir Təşkilat komitəsi üzvlərinin və ötən ilin “Yüksəliş” müsabiqəsi qaliblərindən Orxan Quliyevin nitqi ilə davam edib.

İdarəçi rəhbərlər çıxışlarında “Yüksəliş” müsabiqəsinin yeni nəsil idarəçilərin aşkara çıxarılması və formalaşmasında oynadığı əhəmiyyətli rolu vurğulayıb, müasir idarəçiliyin tələblərinə və rəqabətli insan kapitalının önəminə diqqət çəkiblər.

Azərbaycan Respublikasının iqtisadiyyat naziri Mikayıl Cabbarov öz çıxışında idarəçiliyin əsas şərtlərindən birinin məsuliyyəti dərk etmək olduğunu və müasir dövrün idarəçisi olaraq individuallıqdan komanda işinə keçməyin əhəmiyyətini qeyd edib. Mikayıl Cabbarov bildirib ki, idarəçiyə etimad, etibar və inam önəmlidir. O, həmçinin əlavə edib: “Yaxşı idarəçi səlahiyyətin çoxunun onda olmasını nəzərə alaraq hər zaman məsuliyyətin də əsas hissəsini öz üzərinə götürməlidir. Rəqəmsallaşmanın geniş yayıldığı belə bir dövrdə müasir idarəçilər də individuallıqdan uzaqlaşaraq imkan yaradan şəxslərə çevrilməlidir. Bu isə öz növbəsində əsl idarəçinin güclü kadrlardan ibarət komandaya sahib olması və komanda olaraq qərar qəbul etmək bacarığına sahib şəxslərə çevrilməsidir”.

Azərbaycan Respublikasının təhsil naziri Emin Əmrullayev nitqində təhsildə kompetensiyaların hesablanmasının əhəmiyyətindən danışaraq bir sıra hallarda data əsaslı qərar verməklə yanaşı reallığa və kontekstə uyğun qərar verilməsi gərəkdiyini bildirib. Lakin o vurğulayıb ki, idarəçinin əsas missiyalarından biri reallığı dəyişməkdir və əsl idarəçi bu kimi çətin vəziyyətlərdə necə qərar qəbul edəcəyinə əsasən müəyyən olunur.

Birinci “Yüksəliş” müsabiqəsi qaliblərindən Orxan Quliyev isə potensial idarəçi şəxslərin, intellektual şəxslərin bir araya toplanması, onların şəbəkələşməsi, bir-birlərinin peşəkar fəaliyyəti ilə yaxından tanış olmasının “Yüksəliş” müsabiqəsinin iştirakçılara qatdığı ən böyük dəyər olduğunu vurğulayıb.

Gənclər və idman nazirinin müavini, İşçi Qrupunun rəhbəri Fərhad Hacıyev “Yüksəliş” müsabiqəsi finalçılarına səslənərək istedadlı kadrların seçilməsi, inkişaf etdirilməsi üzrə layihənin keçirilməsində yaxından iştirak etdikləri üçün məmnunluq və qürur hissi duyduğunu bildirib. Fərhad Hacıyev onu da əlavə edib ki, ilk müsabiqənin şəffaf şəkildə təşkili və həyata keçirilməsi bizə bu yolda yeni dostlar qazandırmış, ölkənin savadlı mütəxəssislərini üzə çıxararaq onların şəxsi inkişafına böyük zəmin yaratmışdır. Son olaraq işçi qrupunun rəhbəri finala qədər gələn hər bir iştirakçının əzmi, bacarığı və səriştələri ilə artıq qalibiyyətə bərabər uğur qazandığını vurğulayıb və onlara uğurlar arzulayıb.

Qeyd edək ki, finalda müsabiqənin əvvəlki dörd mərhələsini uğurla başa vuran 116 nəfər iştirakçı mübarizə aparır. Qeyd edək ki, final mərasimində ali məktəblərin rektorları, dövlət və özəl strukturların rəhbərləri də iştirak edib.

Final mərhələsi 3 gün davam edəcək və müsabiqə 17 iyulda yekunlaşacaq. Bu mərhələni uğurla keçən iştirakçıları 1 il ərzində idarəçi rəhbərlərdən - iri şirkətlərin top-menecerlərindən və dövlət qurumlarının rəhbərlərindən fərdi karyera məsləhətləri almaq imkanı, kadr ehtiyatı bankına daxil edilmə və 20.000 AZN dəyərində pul mükafatı gözləyir.

"Yüksəliş" müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixində imzaladığı Sərəncamla intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.

Məqalədə:
Xəbər lenti

Xəbər lenti