Bakı. Trend:
Dünyanın nüfuzlu reytinqlərindən olan “UI GreenMetric” reytinq sisteminin 2024-cü il üzrə nəticələri açıqlanıb. Azərbaycan Memarlıq və İnşaat Universiteti (AzMİU) bu siyahıda böyük nailiyyət əldə edərək əvvəlki mövqeyini yaxşılaşdırıb. Universitetimiz 813-cü yerdən 632-ci yerə yüksələrək 8-ci dəfə bu siyahıda qərarlaşıb.
Bu uğur AzMİU-nun ekoloji dayanıqlılıq, yaşıl kampus prinsipləri və davamlı inkişaf sahəsindəki ardıcıl fəaliyyətlərinin nəticəsidir. Universitet rəhbərliyi yaşıl kampus strategiyasını daha da inkişaf etdirmək üçün müxtəlif layihələr həyata keçirir. Bu layihələr arasında tullantıların təkrar emalı, enerji səmərəliliyi və ekoloji təhsilə yönəlmiş təşəbbüslər xüsusi yer tutur.
AzMİU-nun irəliləyişi universitetin tələbə və əməkdaşlarına davamlı və yaşıl mühit təmin etmək istiqamətindəki səylərinin uğurlu nəticəsi olaraq dəyərləndirilir. Universitet, davamlı inkişaf məqsədlərinə uyğun yeni layihələr və təşəbbüslər həyata keçirməyə davam edəcək.
Qeyd edək ki, “UI GreenMetric” reytinq sistemi dünyanın 95 ölkəsindən 1,477 universiteti əhatə edən qlobal platformadır. Bu sistem universitetlərin iqlim dəyişikliyi, təmiz enerji, su ehtiyatlarının qorunması, tullantıların təkrar emalı və yaşıl nəqliyyat sahələrindəki fəaliyyətlərini qiymətləndirir. Cari il reytinq “UI GreenMetric Dünya Universitet Reytinqləri: İrəliyə Doğru Yol” mövzusu ilə təqdim olunub. Məqsəd qlobal davamlılıq hədəflərinə doğru daha çox universitetin töhfə verməsini təşviq etməkdir.