OMON-çuların Hüquqlarını Mudafiə Komitəsi axtarışda və həbsdə olan OMON-çuların siyahısını Azərbaycan Respublikası Prezidenti yanında Əfv Komissiyasına təqdim edib. Bu barədə Trend ə Komitənin rəhbəri Famil Süleymanov məlumat verib.
"OMON-çulardan 4 nəfəri ömürlük, 15 nəfəri 15 ilə qədər məhkum edilənlər, 4 nəfəri isə həbsli axtarışda olanlardır. Əfv Komissiyasına müraciət etmişik. Ömürlük həbsdə olan OMON-çular barədə məhkəmə hökmünün dəyişdirilməsini və cəzalarının yüngül cəza ilə əvəz edilməsini, barələrində 15 illik həbs cəzası olan məhkumların cəzanın çəkilməmiş hissəsindən azad olunmasını, axtarışda olan OMON-çularınsa cinayət işinə xitam verilməsini xahiş etmişik. Siyahı həmin OMON-çularının valideynlərinin Komitəyə müraciəti əsasında hazırlanıb", - deyə Komitə sədri söyləyib.
F.Süleymanov onu da bildirib ki, indiyə qədər OMON-çuların çox hissəsi mərhum Prezident Heydər Əliyevin və hazırkı Prezident İlham Əliyevin humanistliyi sayəsində azadlığa çıxıb. Komitə sədri əmin olduğunu vurğulayıb ki, bu dəfəki müraciət də müsbət həllini tapacaq.