ABŞ-da Amerika-Azərbaycan Tədiqatlar İnstitutu yaradılıb. Trend in məlumatına görə, bu barədə jurnalistlərə Bakıda səfərdə olan Vüral Cengiz dekabrın 4-də keçirdiyi mətbuat konfransında açıqlama verib.
O qeyd edib ki, Bakıya səfərində məqsəd bu barədə Azərbaycan ictimaiyyətini məlumatlandırmaqdır. V.Cengiz yeni yaradılmış qurumun fəaliyyət istiqamətləri ilə bağlı müvafiq dövlət qurumlarının rəhbərləri, Xarici Ölkələrdə Yaşayan Azərbaycanlılarla İş üzrə Dövlət Komitəsinin sədri Nazim İbrahimovla müzakirələr aparacaq. Onun sözlərinə görə, İnstitutun məqsədi Azərbaycanla ABŞ arasında münasibətlərin inkişafına dəstək vermək, Amerika ictimaiyyətinə Azərbaycanı tanıtmaq, onlara ölkəmizlə bağlı həqiqətləri, torpaqlarımızın işğal edilməsi barədə məlumatları çatdırmaq, erməni təbliğatı ilə mübarizə aparmaqdır. Tədqiqatlar İnstitutu həmçinin Amerika və Azərbaycan şəhərlərinin qardaşlaşması layihəsini həyata keçirəcək, tələbə mübadiləsi aparacaq, Vaşinqtonda, Bakıda tədbirlər keçirəcək, ölkələr arasında nümayəndə heyətlərinin qarşılıqlı səfərlərini təşkil edəcək. V.Cengizin sözlərinə görə, İnstitut Azərbaycanın turizm, iqtisadiyyat sahələrinə də töhfə verməyi nəzərdə tutur. İlk tədbir ABŞ Konqresində keçiriləcək, Qars-Axalkalaki-Tbilisi-Bakı dəmir yolu layihəsi barədə müzakirələr aparılacaq.
Vüral Gengizin rəhbərliyi lə yaradılan və başçılıq etdiyi İnstitutun ABŞ-da dövlət qeydiyyatına alınması üçün sənədləri təqdim olunub və mərkəzi ofisi Vaşinqtonda yerləşir. Bu qurumda Azərbaycanı tanıyan, araşdıran amerikalı alimlər də təmsil olunacaqlar.
Trend-in ən mühüm və maraqlı xəbərlərini "Telegram"da izləyin
