Azərbaycan, Bakı / Trend müxbir K. Zərbalıyeva/ Qəsdən adamöldürmə cinayəti üzrə bəraət alan Azərbaycan Dövlət Neft Şirkətinin Hərbiləşdirilmiş Mühafizə İdarəsinin sabiq əməkdaşi Nadir Ağabalayev Daxili İşlər Nazirliyinin, Respublika Prokurorluğunun, Bakı şəhər və Yasamal rayon prokurorluqlarının rəhbərliyini məhkəməyə verib. Vəkil Vüqar Xasayev Trend ə bildirib ki, Cinayət Məcəlləsinin 120.2.3-cü maddəsi ilə ittiham olunan Ağabalayev Yasamal rayon məhkəməsinə verdiyi iddiasında əsassız həbsində və istintaqın qərəzli aparılmasında təqsirkar şəxslərin vurulmuş maddi və mənəvi ziyana görə 200 min manat məbləğində kompensasiya ödəməsini tələb edir.
Bu gün iddia üzrə Yasamal rayon məhkəməsində hakim İsa İsmayılovun sədrliyi ilə hazırlıq iclası keçirilib. İddia üzrə məhkəmə baxışı aprelin 24-ə təyin olunub.
Ağabalayev barəsində Ağır Cinayətlərə Dair İşlər Üzrə Məhkəmə bəraət hökmü çıxarıb. Respublika Prokurorluğunun vəsatəti üzrə Apellyasiya və Ali məhkəmələrdə araşdırma aparılıb və birinci instansiya məhkəməsinin hökmü qüvvədə saxlanılıb.