Azərbaycan, Gəncə / Trend , müxbir V.Məmmədov/ Gəncə şəhərində qadın məsləhətxanalarına müraciət edən hər 10 qadının 7-də cinsi yolla keçən xəstəlik müşahidə olunur. Bu barədə bazar ertəsi "Ailə və nigah" məsləhətxanasının baş ginekoloqu Raya Məmmədova məlumat verib. Onun sözlərinə görə, bu kimi viruslar sonsuzluq və uşaq ölümlərinin sayının artmasının ən başlıca amilləri sırasındadır.
"Cinsi yolla keçən xəstəliklər mama-ginekologiyada mövcud olan ən vacib problemlərdəndir. Son vaxtlar sərhədlərin şəffaf olması nəticəsində qazanc dalınca xaricə üz tutan kişilərin virusa yoluxaraq geri qayıtması hallarını ciddi problem kimi dəyərləndirmək olar. Çünki müşahidələr göstərir ki, cinsi yolla keçən viruslara yoluxan qadınların əksəriyyəti yoldaşları xaricdə işləyənlərdir" - deyə Məmmədova deyib.
Gəncə Qadın Məsləhətxanasının baş həkimi Rəna Bağırova da cinsi yolla keçən xəstəliklərə düçar olanların sayının artmasının müşahidə olunduğunu təsdiqləyib.
Bağırova xəstəliyə yoluxanlarda əsasən sifilis, xlamidiya və fetameqala törədicilərinin aşkar olunduğunu söyləyib.
Gəncə paytaxt Bakıdan 365 kilometr qərbdə yerləşir.