Azərbaycan, Bakı / Trend müxbir E.Cavadova/ Bu gün Ağır Cinayətlərə Dair İşlər üzrə Məhkəmədə hakim Tofiq Paşayevin sədrliyi ilə sabiq iqtisadi inkişaf naziri Fərhad Əliyevin, onun qardaşı, "Azpetrol" Şirkətlər Qrupunun keçmiş prezidenti Rafiq Əliyevin və onlarla birlikdə təqsirləndirilən digər 17 şəxsin məhkəməsi davam edib.
Məhkəmə iclasında R.Əliyevin vəkili Muxtar Mustafayevin iyulun 17-də məhkəmədə qaldırdığı vəsatət müzakirə olunub. Vəkil vəsatətində R.Əliyevə qarşı irəli sürülmüş ittihamların əsassız olduğunu göstərərək, onun zaminə buraxılmasını xahiş etmişdi. Müzakirələrdən sonra məhkəmə tərkibi müşavirəyə gedib. Təqribən bir saatdan sonra məhkəmə zalına qayıdan hakimlərin qərarı isə belə olub: "Məhkəmə istintaqı başa çatmayanadək və Rafiq Əliyevə qarşı irəli sürülmüş ittihamlar tam araşdırılmayanadək həmin ittihamların əsaslı və yaxud əsassız olduğunu söyləmək tezdir. Bu səbəbdən də Rafiq Əliyev barəsindəki həbs qətimkan tədbiri dəyişdirilmədən saxlanılır".
Daha sonra hakim Paşayev bildirdi ki, F.Əliyevin vəkili Elton Quliyev günün birinci yarısı məhkəmə iclasında iştirak etmədiyinə görə şahidlərin dindirilməsi mümkün deyil və məhkəmə iclasına saat 16:00-dək fasilə verildi.
Qeyd edək F.Əliyev və onunla birlikdə mühakimə olunanlar qanunsuz özəlləşdirmə, vergidən yayınma, mənimsəmə, israf etmə və digər iqtisadi cinayətlərdə təqsirli bilinirlər.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
