Azərbaycan, Bakı, 2 iyun /Trend/
Cari mövsümü Azərbaycan Kubokunu qazanmaqla yüksək notlarla başa vuran "Bakı" futbol klubu gələn həftədən etibarən bir araya gəlir. Toplanış iyunun 5-nə elan olunub.
Trend klubun rəsmi saytına istinadən məlumat verir ki, həmin gündən komanda UEFA Avropa Liqası və növbəti ölkə çempionatının hazırlıqlarına start verəcək. İlkin mərhələdə 1 həftə ərzində paytaxda məşqlər keçəcək "Bakı" Qəbələyə yollanacaq və iyunun 16-dək burada məşq edəcək.
Hazırlığın ikinci mərhələsi ənənəyə uyğun olaraq Sloveniyada baş tutacaq. Klub iyunun 18-29-da məşq etməklə bərabər 3 yoldaşlıq oyunu keçirəcək.
Üçüncü mərhələ UEFA Avropa Liqası püşkünün nəticəsinə görə təyin olunacaq. Bu zaman rəqibin kimliyi və ilk oyunun hansı meydanda keçiriləcəyi həlledici faktor kimi qəbul olunacaq.