Azərbaycan, Bakı, 1 avqust /Trend, müxbir M.Əliyev/
Azərbaycanın 2012/2013-cü il futbol üzrə çempionatı çox maraqlı, gərgin mübarizə şəraitində keçəcək. Bunu çərşənbə günü Trend-ə Peşəkar Futbol Liqasının (PFL) prezidenti Ramin Musayev bildirib.
"Bu il heç bir klubumuzun maliyyə problemi yoxdur. Əksinə, ötən ilə baxanda avqustun 4-də start veriləcək çempionatda daha çox transferlər həyata keçirilib, yeni oyunçular alınıb. Məhz bu səbəbdən bu il daha maraqlı və gərgin mübarizə görə bilərik", - o deyib.
Musayevin fikrincə, 7-8 klub çempionluq uğrunda mübarizə aparacaq.
Çempionatın hakimlərinə müraciət edən PFL prezidenti deyib ki, yaxşı hakimlik edənlər Premyer Liqada çalışacaq, hakimliyi bacarmayanlar oyunlara cəlb olunmayacaq.
"Hakimlər yay ərzində çox gözəl təlim-məşq keçiblər, fiziki durumları yüksək səviyyədədir", - o deyib.
Musayev gənc hakimlərin səviyyəsini də qənaətbəxş qiymətləndirdiyini deyib.