Azərbaycan, Bakı, 11 oktyabr /Trend/
12-14 oktyabr 2012-ci il tarixdə Qroznıda Çeçenistan Prezidenti Ramzan Kadırovun Kuboku və əməkdar idman ustası Adlan Varayevin Prizi uğrunda sərbəst güləş üzrə IV beynəlxalq turnir keçiriləcək.
Azərbaycan Güləş Federasiyasının mətbuat xidmətindən Trend-ə verilən məlumata görə, məşqçilər Rövşən Hacıyev və Siracuddin Eldarovun rəhbərliyi altında turnirdə yığma komandanın 11 üzvü iştirak edəcək.
Heyətdə Yaşar Əliyev, Qalib Əliyev (hər ikisi 55 kq), Hacı Əliyev (60 kq), Ruslan Dibirhacıyev (66 kq), Aleksandr Qostiyev (74 kq), İlya Xamikoyev, Roman Bəkirov (hər ikisi 84 kq), Aslanbek Alborov, İlham Abidov (hər ikisi 96 kq), Aslan Dzebişov, Əli İsayev, Əli Maqomedabirov (hamısı 120 kq) yer alıb.
Turnirin proqramına əsasən, oktyabrın 13-də 55, 66, 84 və 120 kq, oktyabrın 14-də isə 60, 74 və 96 kq çəki dərəcələrində qaliblər müəyyənləşəcək.