Azərbaycan, Bakı, 23 fevral /Trend, müxbir İ.İzzət/
Bakıda 2015-ci ildə keçiriləcək I Avropa Olimpiya Oyunlarına hərtərəfli hazırlıq gedir. Trend-in məlumatına görə, bu barədə şənbə günü jurnalistlərə Azərbaycanın gənclər və idman naziri Azad Rəhimov bildirib.
Onun sözlərinə görə, Azərbaycanda 1970-80-ci illərdə tikilmiş idman qurğularının vəziyyəti öyrənilir. Bu qurğuların hansı səviyyədə təmir, yenidənqurma və əlavə işlərin aparılmasına ehtiyac olduğu müəyyənləşdirilir. Artıq müəyyən çatışmazlıqlar da qeydə alınıb.
"Yoxlamaların nəticələrinə görə, Heydər Əliyev adına İdman-Konsert Kompleksinin məşq zalları təmir edilməlidir. Atıcılıq stendində yeni stend tikilməlidir. Tüfəng və tapança tiri üçün zal tikmək lazımdır. Bakı İdman Sarayında işlər aparılmalıdır. Orada sanitar qovşağı qaydaya salınmalı, əlavə oturacaqlar qoyulmalıdır. Sarayda 4 idman növü üzrə - taekvondo, karate, badminton və stolüstü tennis yarışlarının keçirilməsi nəzərdə tutulub. Həmçinin tribunalar, restoran və kafelər tikilməlidir", - Rəhimov deyib.
Nazir qeyd edib ki, işlər o qədər də böyük olmasa da, yüksək peşəkarlıq tələb edir.
Rəhimov bildirib ki, Su-Hovuz Kompleksi, Olimpiya Futbol Stadionu və Gimnastika Kompleksinin tikintisi davam etdirilir. Onun fikrincə, bu qurğular tam yüksək səviyyəli, bütün standartlara cavab verən obyektlər olacaq.
Gənclər və idman nazirinin sözlərinə görə, hələlik Bakıda "Olimpiya kəndi"nin tikilməsi nəzərdə tutulmayıb.
Nazirin sözlərinə görə, hələ ki görüləcək işlər üçün tələb olunan xərcləri hesablamaq qeyri-mümkündür.
"Bunun üçün smeta tutulmalıdır, qiymətqoyma keçirilməlidir. Bu, nə bir günün, nə də bir ayın məsələsidir. Avropa Olimpiya Komitəsinin də xahişidir ki, artıq pullar xərclənməsin. Yəni burada iri obyektlər tikilib sonra boş qalmasın və dövlətin puluna hərtərəfli qənaət olunsun", - Rəhimov vurğulayıb.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
.jpg)
