Azərbaycan, Bakı, 6 iyun /Trend/
Azərbaycan Güləş Federasiyası (AGF) və Misir Güləş Federasiyası arasında əldə olunan razılığa əsasən, Misir güləş yığma komandaları iyunun 19-dək Bakıda birgə təlim-məşq toplanışında iştirak edir.
AGF-dən Trend-ə verilən məlumata görə, bu gün sərbəst güləş üzrə Misir yığma komandasının mətbuat üçün açıq məşqi keçirilib.
Misir sərbəst güləş yığmasının baş məşqçisi Mahmud Mustafa təlim-məşq toplanışının yüksək səviyyədə keçirildiyini bildirib: "Azərbaycan güləş yığması dünyanın ən güclü komandalarından biridir. Birgə təlim-məşq toplanışı idmançılarımızın hazırlığı üçün çox əhəmiyyətlidir. Azərbaycanda birgə təlim-məşq toplanışında iştirak etmək bizim güləşçilərimiz üçün böyük təcrübə olacaq. Təlim-məşq toplanışından sonra Türkiyənin Mersin şəhərində Aralıq dənizi Oyunlarına yollanacağıq".
O, qeyd edib ki, Azərbaycanda güləşə göstərilən diqqət idmançıların beynəlxalq arenada uğurla çıxış etməsinə təkan verir: "Məhz buna görə də Azərbaycan güləşçiləri qatıldıqları hər bir beynəlxalq yarışdan, Avropa və dünya çempionatlarından, Olimpiya Oyunlarından müxtəlif əyarlı medallar qazanırlar".
