Azərbaycan, Bakı, 29 aprel /Trend/
Xorvatiyada velosiped idmanının şose növü üzrə gənclər arasında ənənəvi "Tour of Istria" yarışı keçirilib.
Azərbaycan Velosiped İdmanı Federasiyasından Trend-ə verilən məlumata görə, üç gün davam edən yarışda Azərbaycanı yeniyetmə və gənclərdən ibarət yığma komandaların baş məşqçisi Əbülfəz Məmmədovun rəhbərliyi altında 5 idmançı təmsil edib.
Yürüşün 114 km-dən ibarət ilk mərhələsində yığma komanda üzvlərimizdən ən yaxşı nəticəyə Elgün Əlizadə imza atıb - o, məsafəni liderlər qrupunda 2 saat, 41 dəqiqə, 59 saniyəyə başa vurub və fotofinişə əsasən 16-cı olub.
İkinci mərhələdə 90 km-lik dağ yollarında mübarizə aparan velosipedçilərimizdən yenidən E.Əlizadə fərqlənməyi bacarıb - o, liderdən 23 saniyə geri qalmaqla 33-cü nəticə göstərib - 2 saat, 34 dəqiqə, 40 saniyə.
Və nəhayət, 112 km məsafəni əhatə edən son mərhələdə E.Əlizadə və Kənan Qəhrəmanlı finişi liderlər qrupunda bitiriblər - 2 saat, 47 dəqiqə, 2 saniyə. Fotofinişə əsasən Elgün 25-ci, Kənan isə 30-cu olub.
3 mərhələnin yekununa əsasən, idmançılarımız arasında ən yüksək nəticəyə E.Əlizadə imza atıb - o, yarışın qalibindən 36 saniyə geri qalmaqla "Tour of Istria"nı 28-ci pillədə bitirib.
Qeyd edək ki, builki yarışda 25 ölkədən 150 velosipedçi mübarizə aparıb. Gənclər arasında təşkil edilən "Istria" turu yeni istedadların üzə çıxması baxımından mütəxəssislər tərəfindən önəmli turnir kimi dəyərləndirilir.
