...

Azərbaycanda ağır atletikanın inkişaf perspektivləri müzakirə olunub

İdman Materials 5 Aprel 2016 18:49 (UTC +04:00)
Azərbaycanda ağır atletikanın inkişaf perspektivləri Bakıda Beynəlxalq Ağır Atletika Federasiyasının prezidenti Tomaş Ayan ilə müzakirə olunub.
Azərbaycanda ağır atletikanın inkişaf perspektivləri müzakirə olunub

Bakı. Trend:

Aprelin 5-də Azərbaycan Ağır Atletika Federasiyasının rəhbəri Cahangir Əsgərovun Bakıda səfərdə olan Beynəlxalq Ağır Atletika Federasiyasının prezidenti Tomaş Ayan ilə görüşü keçirilib.

Azərbaycan Ağır Atletika Federasiyasının mətbuat xidmətindən Trend-ə verilən məlumata görə, görüşdə Azərbaycanın gənclər və idman naziri Azad Rəhimov, gənclər və idman nazirinin müavini İsmayıl İsmayılov, Gənclər və İdman Nazirliyinin Dopinqlə mübarizə sektorunun rəhbəri İradə Rüstəmzadə, Azərbaycan Ağır Atletika Federasiyasının rəhbər və məşqçi heyəti iştirak edib.

Söhbət zamanı Azərbaycan Ağır Atletika Federasiyasının rəhbəri Cahangir Əsgərov Azərbaycan Prezidenti İlham Əliyevin ölkədə idmanın inkişafına göstərdiyi diqqətdən danışıb. C.Əsgərov bildirib ki, Azərbaycanda idman infrastrukturunun inkişafı üçün kompleks işlər görülür. Ölkədə geniş maddi-texniki bazaya malik idman infrastrukturu yaradılıb, idmanın inkişafı üzrə dövlət proqramları qəbul edilmişdir və idmançıların sosial problemləri uğurla həll olunur.

T.Ayan öz növbəsində qeyd edib ki, Beynəlxalq Ağır Atletika Federasiyasına üzv olan heç bir ölkədə idman sahəsində belə sürətli inkişaf və dövlət dəstəyi görməyib.

Görüşdə, həmçinin Hyustonda dünya çempionatının yekunlarına əsasən bəzi azərbaycanlı ağır atletlərin dopinq testinin müsbət çıxmasından narahatlıq ifadə olunub. Qeyd olunub ki, idmanda dopinq məsələləri Azərbaycanda ciddi narahatçılıq doğurur. Bu məsələyə ən yüksək səviyyədə baxılır və gələcəkdə bu kimi halların təkrarlanmaması üçün ciddi tədbirlər görülür.

Hazırda azərbaycanlı ağır atletlərin bəzi dopinq testlərinin müsbət çıxmasının səbəblərinə dair ciddi daxili araşdırma aparılır ki, bunun da nəticələri ən yaxın zamanda məlum olacaq.

Görüşün sonunda C.Əsgərov Azərbaycanda gözəl gənc nəslin yetişdiyini qeyd edib, həmçinin ölkə regionlarında bu idman növü üzrə yeni istedadlı gənclərin axtarışı və cəlb olunmasına dair göstərişlər verib.

Məqalədə:
Xəbər lenti

Xəbər lenti