Bakı. Trend:
Trend Azərbaycan Gimnastika Federasiyasının mətbuat xidmətinə istinadən İsrailin akrobatika üzrə qadınlardan ibarət milli komandasının məşqçisi Şiran Ouaknine ilə müsahibəni təqdim edir:
- Azərbaycana xoş gəlmisiniz. Zəhmət olmasa, səfərinizin məqsədi barədə məlumat verərdiniz.
- Azərbaycana səfərimizin məqsədi burada təlim-məşqlərdə iştirak etməkdir. Qadınlardan ibarət yığma komandamızın üzvləri ABŞ-da keçiriləcək Dünya Oyunlarında İsraili üçlük proqramında təmsil edəcəklər. Biz bu yarışa ciddi hazırlıq prosesi keçirik.
- Təlim-məşqlərdə iştirak edən komandanızın heyətində neçə idmançı yer alıb?
- Komandamızın tərkibi üç qadın və dörd kişi idmançıdan ibarətdir.
- Nə qədər müddətdir ki, məşqçilik edirsiniz?
- 11 ildir ki, məşqçi kimi çalışıram. Əvvəllər isə qadın cütlüyü proqramında böyüklər yaş kateqoriyasına qədər yarışlarda gimnast kimi çıxış etmişəm.
- İsraildə akrobatika gimnastikasının inkişafı barədə fikirlərinizi bilmək istərdik.
- İsraildə akrobatika gimnastikasının inkişafına böyük önəm verilir. Bu növ üzrə çoxlu gimnastlarımız var. Bizim dünya və Avropa çempionu titulunu qazanmış idmançılarımız var. Onlar dəfələrlə İsraili müxtəlif yarışlarda təmsil ediblər.
- Azərbaycana ilk dəfədir ki, səfər edirsiniz?
- Xeyr. Üç ay bundan əvvəl dünya çempionatı zamanı və Avropa Oyunları keçirilərkən Bakıda olmuşam.
- Yeri gəlmişkən, Azərbaycanda keçirilən dünya çempionatında idmançılarınız necə çıxış etdi?
- Yığmamızın üzvləri qadınlar arasında üçlük proqramında temp hərəkətlərində üçüncü oldular. Kişilər iki dəfə üçüncü yeri tutdular və bir gümüş medal qazandılar.
- Milli Gimnastika Arenasında məşq etmək xoşunuza gəlirmi?
- Arena çox böyükdür. Təəssüf ki, İsraildə belə bir idman zalı yoxdur. Bakı şəhəri çox xoşumuza gəldi. Çoxlu peşəkar gimnastlarınız var. Biz həqiqətən burada qalmağı çox sevirik.