...

Beynəlxalq Ticarət Mərkəzi: Azərbaycanla əlaqələrin inkişafı üçün böyük potensial var

İqtisadiyyat Materials 4 İyul 2017 15:49 (UTC +04:00)
Bu gün itisadiyyat naziri Şahin Mustafayev Beynəlxalq Ticarət Mərkəzinin direktoru xanım Arança Qonzaleslə görüşüb.
Beynəlxalq Ticarət Mərkəzi: Azərbaycanla əlaqələrin inkişafı üçün böyük potensial var

Bakı. Trend:

Bu gün itisadiyyat naziri Şahin Mustafayev Beynəlxalq Ticarət Mərkəzinin direktoru xanım Arança Qonzaleslə görüşüb.

Nazir Ş.Mustafayev Beynəlxalq Ticarət Mərkəzinin direktoru A.Qonzalesi Azərbaycana ilk səfəri və Mərkəzin ölkəmizlə əməkdaşlığa başlaması münasibəti ilə təbrik edib, Birləşmiş Millətlər Təşkilatı və Ümumdünya Ticarət Təşkilatının birgə agentliyi olan Beynəlxalq Ticarət Mərkəzi ilə əməkdaşlığın əhəmiyyətini vurğulayıb.

Azərbaycan 25 ildir ki, BMT ilə, eləcə də BMT-nin UNCTAD, UNİDO, UNESCO və digər qurumları ilə uğurlu əməkdaşlıq edir. 2012-2013-cü illərdə Azərbaycan BMT Təhlükəsizlik Şurasının qeyri-daimi üzvü olub, 2016-cı ilin aprelində Bakıda BMT-nin Sivilizasiyalar Alyansının 7-ci Qlobal Forumu keçirilib, BMT-nin Dayanıqlı İnkişaf Məqsədlərinin milli icra mexanizmi kimi ölkəmizdə Dayanıqlı İnkişaf üzrə Milli Əlaqələndirmə Şurası yaradılıb.

İqtisadiyyat naziri Azərbaycan Prezidenti İlham Əliyevin rəhbərliyi ilə ölkədə həyata keçirilən iqtisadi islahatlar, xüsusilə qeyri-neft sektorunun inkişafı istiqamətində həyata keçirilən tədbirlər, rəqabətədavamlı qeyri-neft məhsullarının istehsalı, ixracın genişləndirilməsi, xarici ölkələrə təşkil edilən ixrac missiyaları, “Made in Azerbaijan” brendinin təbliği və s. barədə geniş məlumat verib. Bildirilib ki, Azərbaycanda kiçik və orta sahibkarlığın inkişafında, ixracın rəqabət qabiliyyətinin artırılmasında beynəlxalq təcrübəyə xüsusi önəm verilir. Bu istiqamətdə əlverişli iqtisadi-coğrafi mövqeyə və insan resurslarına malik olan Azərbaycanla Beynəlxalq Ticarət Mərkəzi arasında əməkdaşlıq faydalı olacaq. Bu baxımdan Azərbaycanda İxracın və İnvestisiyaların Təşviqi Fondu (AZPROMO) və Beynəlxalq Ticarət Mərkəzi arasında imzalanacaq Anlaşma Memorandumunun əlaqələrin inkişafında əhəmiyyəti qeyd edilib.

Beynəlxalq Ticarət Mərkəzinin direktoru A.Qonzales Azərbaycana ilk səfərindən və ölkəmizlə əməkdaşlıqdan məmnunluğunu ifadə edib. Bildirilib ki, Azərbaycanla əlaqələrin inkişafı üçün böyük potensial var. Azərbaycanda kiçik və orta sahibkarların istehsal etdiyi məhsulların rəqabət qabiliyyətinin artırılması və xarici bazarlara daha çox çıxarılması, eləcə də beynəlxalq elektron kommersiya platformalarına (məs. Ebay) birbaşa çıxışın əldə edilməsi sahəsində uğurlu əməkdaşlıq etmək olar.

Məqalədə:
Xəbər lenti

Xəbər lenti