Bakı. Trend:
Azərbaycan Mərkəzi Bankı (AMB) və Qazaxıstan Milli Bankı arasında yeni maliyyə hesabatlığı standartlarının tətbiqi prosesləri müzakirə olunub.
Bu barədə Trend AMB-yə istinadən xəbər verir.
Belə ki, Azərbaycan Mərkəzi Bankı ikitərəfli əməkdaşlıq
çərçivəsində Qazaxıstan Milli Bankının nümayəndə heyətini qəbul
edib.
Mərkəzi Bankda keçirilən interaktiv görüşlərdə əsas diqqət maliyyə
sektorunda və xüsusilə mərkəzi (milli) banklarda müasir
təcrübələrin, o cümlədən tənzimləyici yeniliklərin mübadiləsinə
yönəldilib.
Görüşlərdə konsolidasiya olunan maliyyə hesabatlığı üçün hazırkı
avtomatlaşdırılmış bank informasiya sistemlərinin imkanları və
inkişafı, Maliyyə Hesabatlarının Beynəlxalq Standartlarının
tələblərinə əsasən maliyyə alətlərinin, digər aktiv və öhdəliklərin
tanınması və qiymətləndirilməsi, eləcə də yeni maliyyə hesabatlığı
standartlarının tətbiqi prosesləri müzakirə olunub.
Tərəflər həmçinin maliyyə hesabatlılığında şəffaflığın artırılması
üzrə mühüm mövzular və qarşılıqlı maraq doğuran digər məsələlər
ətrafında fikir mübadiləsi aparıb.