Azərbaycan, Bakı, 28 yanvar / Trend , müxbir E.İsmayılov/
Qafqaz regionu və Türkiyənin işçı qrupları Avropa-Qafqaz-Asiya (TRACECA) nəqliyyat dəhlizi çərçivəsində fevralda İstanbul şəhərində dəhlizin investisiya forumuna təqdim olunacaq layihələri müzakirə edəcəklər. Bu barədə cümə axşamı TRACECA-nın Azərbaycandan olan milli katibi Akif Mustafayev bildirib.
"Qafqaz regionu və Türkiyənin işçi qruplarının iclası fevralın 12-də təşkil ediləcək. İclasda bu ilin sonunda təşkil ediləcək investisiya forumu üçün layihələr müzakirə ediləcək", - Mustafayev deyib.
Onun sözlərinə görə, forumun dəqiq tarixi və keçirilmə yeri hələlik müəyyən edilməyib.
Milli katib bildirib ki, həmçinin işçi qruplarının fevralın 26-28-də Sofiyada iclasının keçirilməsi gözlənilir. Nəqliyyat dəhlizi çərçivəsində tarif məsələləri bu görüşün gündəliyindədir.
TRASECA-nın iştirakçı ölkələri Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə və Ukraynadır.