Azərbaycan, Bakı, 20 mart / Trend /
Yanvar-fevral aylarında Azərbaycana MDB ölkələrindən 0,236 milyard dollar həcmində əmtəə idxal olunub ki, bu da ölkənin ümumi idxalının 33,57 faizini təşkil edir. Bu barədə şənbə günü Dövlət Gömrük Komitəsindən bildirilib.
MDB ölkələrindən Azərbaycana taxıl bitkiləri (ümumi idxalın 14,84 faizi), quru nəqliyyat vasitələri (9,02 faiz), avadanlıqlar və onların ehtiyat hissələri (10,19 faiz), ağac kömürü (8,45 faiz), qara metallurgia məmulatları (təxminən 7 faiz) və b. gətirilib
Azərbaycandan MDB ölkələrinə ixracın dəyəri 0,365 milyard dollar (ümumi ixracın 11,35 faizi) təşkil edib.
MDB ölkələrinə əsasən mineral yanacaq, neft və neft məhsulları, bitum mineralları (ümumi ixracın 44,4 faizi), gəmilər və üzgü vasitələri (33 faiz), heyvan və bitki yağları (15,92 faiz), şəkər tozu və qənnadı məmulatları (2,66 fazi), meyvə (2,4 faiz) və b. ixrac olunub.
MDB ölkələri ilə idxal-ixrac əməliyyatları üzrə 129 milyon dollar həcmində müsbət saldo yaranıb.
