Azərbaycan, Bakı, 24 aprel /Trend, müxbir N.İsmayılova/
Azərbaycan Əmlak Məsələləri Dövlət Komitəsi "Biləsuvar Quşçuluq" SC-nin səhmlərinin satışı üzrə investisiya müsabiqəsi elan edib. Bu barədə şənbə günü Dövlət Komitəsindən bildirilib.
Satışa müəssisənin 30,02 faizlik səhm paketi çıxarılıb. Müsabiqədə Azərbaycanın fiziki və hüquqi şəxsləri, xarici investorlar iştirak edə bilər.
Müsabiqədə iştirak etmək istəyənlər quş ətinin və yumurtanın istehsalı üçün lazım olan yem komponentlərinin və lazımi avadanlığın alınması və yerləşdirilməsi üzrə təklifləri nəzərdə tutan investisiya proqramını, həmçinin investisiya təklifinin dəyərinin beş faizi həcmində bank zəmanətini təqdim etməlidir. İddiaçılar dövlət büdcəsinə 35 min manatın köçürülməsinə dair təklifləri də təqdim etməlidirlər.
Biləsuvar Quşçuluq quş əti və yumurta istehsalı ilə məşğul olur. Müəssisə Biləsuvar rayonunun Səmədabad kəndində yerləşir.
SC-nin nizamnamə kapitalı 788,24 min manat təşkil edir və bu məbləğə iki manat nominalında 394 121 səhm buraxılıb. Müsabiqəyə 236,65 min manat nominalında 118 325 səhm çıxarılacaq.
Aprelin 1-nə olan vəziyyətə görə, müəssisənin 238,218 min manat məbləğində borcu var. Xammal, xidmət və işlərə görə borclar 60 min manat, əməkhaqqının ödənilməsi üzrə borclar 7 min manat təşkil edir. Müəssisənin debitor borcları 26,371 min manatdır. Müəssisə istismara 1967-1980-cı illərdə verilib.
İddiaçılar müsabiqənin tələbləri, özəlləşdirmə planı ilə tanış olmaq məqsədilə əlavə məlumat üçün 2010-cu il mayın 24-dək saat 10:00-dan 18:00-a qədər aşağıdakı ünvana müraciət edə bilərlər: Bakı şəhəri, Y.Səfərov küçəsi, 20. Sənədlər və təkliflər mayın 24-dək saat 10:00-dan 17:30-dək qəbul olunur.
Təkliflərə 2010-cu il 26 may saat 11:00-dan etibarən Dövlət Komitəsinin binasında müsabiqə komissiyası tərəfindən baxılacaq.
Aprelin 24-nə olan rəsmi məzənnə 0,8036 AZN/USD təşkil edir.
