Azərbaycan, Bakı, 13 may /Trend, müxbir Ü.İsmayılova/
"Aqrolizinq" ASC idxal edilən cins mal-qaranın sığortalanmasına dair tender elan edib. Bu barədə cümə axşamı tender komissiyasının rəsmi mətbuatda çap olunmuş məlumatında deyilir.
"Cins mal-qara üç il müddətinə sığortalanacaq", - məlumatda deyilir.
Azərbaycan Prezidentinin Ehtiyat Fondundan şirkətə 3 milyon manat ayrılıb. Bu vəsait hesabına bu il ərzində Avstriya və Almaniyadan 900 baş cins mal-qaranın alınması planlaşdırılır. Bu mal-qara respublikaya mərhələlərlə gətiriləcək.
Nazirlər Kabinetinin qərarı ilə 2010-cu ildə ötən ildəki kimi cins mal-qara fermerlərə imtiyaz qiymətlərinə əsasən 50 faiz güzəştlə satılacaq. Çəkisi 300-700 kq olan mal-qaranın orta qiyməti 3,5 min manata qədər təşkil edəcək.
"Aqrolizinq" ASC ölkənin 55 rayonunda xidmət məntəqəsinə malikdir. Öz fəaliyyətinə 2005-ci ildə başlayan şirkət bu vaxta qədər 8,817 min aqrotexnika, o cümlədən taxılın yığılması üçün 745 kombayn, 2,25 min traktor, 132 ekskavator və 5,69 min müxtəlif kənd təsərrüfatı texnikasını istifadəyə verib.
Azərbaycanda 24 sığorta və 1 təkrar sığorta şirkəti fəaliyyət göstərir.