Azərbaycan, Bakı, 31 may /Trend/
Azərbaycanın şimal-qərbində baş vermiş sel nəticəsində Qax - Balakən marşrutu üzrə hərəkət edən qatarın hərəkəti dayandırılıb. Bu barədə "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov məlumat verib.
"Bakı - Köçərli - Balakən sərnişin qatarı yalnız Qax stansiyasınadək hərəkət edir. Balakəndən olan sərnişinlər Qaxda qatara minə bilərlər", - Əzməmmədov belə deyib.
Qax - Zaqatala yolunun 122-ci kilometrliyində yağan güclü yağışlar nəticəsində, sel suları dörd hissədə 50 metrə yaxın yolu yuyub-aparıb.
Hazırda hadisə yerində QSC-nin infrastruktur departamentinin əməkdaşları çalışırlar. Hadisə yerinə texnika, eləcə də doqquz vaqon çınqıl gətirilib.