Azərbaycanda idman kompleksinin satışı üzrə müsabiqə elan edib

Azərbaycan, Bakı, 28 yanvar /Trend, müxbir N.İsmayılova/

Azərbaycanın Əmlak Məsələləri Dövlət Komitəsi "Metallurq" idman kompleksinin satışı üzrə investisiya müsabiqəsi elan edib. Trend-in məlumatına görə, bu barədə şənbə günü Dövlət Komitəsinin nəşri olan "Mülkiyyət" qəzetindəki məlumatında deyilir.

Müsabiqədə Azərbaycanın fiziki və hüquqi şəxsləri, habelə xarici investorlar iştirak edə bilərlər.

İddiaçılar investisiya proqramını kompleksin fəaliyyətinin bərpa edilməsi məqsədilə təmir-bərpa və yenidənqurma işlərinin aparılması, yeni iş yerlərinin yaradılması və işçilərin sosial təminatı üzrə təkliflərlə təqdim etməlidirlər.

Müsabiqədə iştirak etmək istəyənlər, həmçinin investisiya təklifinin 5 faizi dəyərində bank zəmanətini və dövlət büdcəsinə 100 min manatın ödənilməsi üzrə təklifi təqdim etməlidirlər.

Kompleks Gəncə şəhəri, T. Arani küçəsi, 6 ünvanında yerləşir. Kompleksin start (satış) qiyməti 265,6 min manat təşkil edir.

İddiaçılar müsabiqənin tələbləri ilə tanış olmaq və əlavə məlumat almaq üçün 29 fevral saat 10:00-dan 17:30-a qədər Bakı, Y.Səfərov küçəsi, 20 ünvanına müraciət edə bilərlər. Sənədlər və təkliflər 29 fevral saat 10:00-dan 17:30-a qədər qəbul edilir. Təkliflər 2 mart saat 16:00-dan başlayaraq Dövlət Komitəsinin binasında Müsabiqə Komissiyası tərəfindən qiymətləndiriləcək.

Yanvarın 28-nə olan rəsmi məzənnə 0,7863 AZN/USD təşkil edir.

Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az

Trend-in ən mühüm və maraqlı xəbərlərini "Telegram"da izləyin