Azərbaycan, Bakı, 5 iyun / Trend, müxbir A.Axundov /
Dövlət Gömrük Komitəsi (DGK) ilk müstəqil iqtisadi operatorların yaradılması prosesində dövlətin iştirakını istisna etmir. Trend-in məlumatına görə, bu barədə DGK-nın sədri Aydın Əliyev çərşənbə axşamı jurnalistlərə bildirib.
Onun sözlərinə görə, bu prosesdə həm özəl, həm də dövlət sektoru iştirak edə bilər.
"Hazırda başqa ölkələrin, o cümlədən bu institutun ilk dəfə yaradıldığı İsveçrənin və Koreyanın bu sahədə təcrübəsi öyrənilir", - Əliyev deyib.
Onun sözlərinə görə, hazırda iqtisadi operatorların fəaliyyətinin təmin olunması üçün normativ sənədlərin qəbul edilməsi prosesi davam edir.
Azərbaycan gömrüyündə müstəqil iqtisadi operatorlar meydana çıxacaq. Onlar 2012-ci il yanvarın 1-dən qüvvəyə minən yeni Gömrük Məcəlləsinin əsas yeniliklərindən biridir.
Gömrük qeydiyyatını həyata keçirə biləcək bu şirkətlər gömrük brokerlərinin fəaliyyəti ilə müqayisədə daha müasir formadadırlar.
Müstəqil iqtisadi operatorlar DGK-nın verəcəyi lisenziyalar əsasında işləyəcəklər.