Azərbaycan, Bakı, 23 oktyabr /Trend, müxbir H. Vəliyev/
Standartlaşdırma, Metrologiya və Patent üzrə Dövlət Komitəsi avtomobil nəqliyyat vasitələrinin texniki baxışının həyata keçirilməsi üçün ixtisaslaşmış mərkəzlərin akkreditasiyası məsələsini nəzərdən keçirir. Trend-in məlumatına görə, bu barədə çərşənbə axşamı jurnalistlərə Dövlət Komitəsinin sədri Ramiz Həsənov deyib.
Onun sözlərinə görə, hazırda Dövlət Komitəsi tərəfindən dövlət gömrük komitəsinin laboratoriyası akkreditasiyadan keçirilib. Laboratoriya respublikaya idxal edilən avtomobillərin texniki baxışını həyata keçirmək səlahiyyətinə malikdir.
Laboratoriya bütün zəruri avadanlığa və ixtisaslaşmış işçi heyətinə malikdir ki, bu da akkreditasiya zamanı əsas meyardır.
"Daxili bazara gəlincə, avtomobillər texniki baxışdan hələlik Dövlət Yol Polisi İdarəsində keçirlər. Lakin güman edirəm ki, artıq bu səlahiyyətlərin texniki baxış keçirmək üçün zəruri imkanlara malik ixtisaslaşmış mərkəzlərə verilməsinin vaxtı çatıb", - Həsənov qeyd edib.