Azərbaycan, Bakı, 12 fevral /Trend, müxbir E.İsmayılov/
İsveçrənin "Stadler" şirkəti Gəncədə vaqonqayırma zavodunun tikinti layihəsini hazırlayır. Bunu çərşənbə günü Trend-ə "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov deyib.
Onun sözlərinə görə, zavod sərnişin vaqonlarının tikintisi və əsaslı təmirini təmin etməyə imkan verəcək: "Hazırda şirkət layihə üzərində iş aparır ki, bu da onun yekun variantını təqdim etməyə imkan yaradacaq".
Gəncədə vaqon deposunun bazasında yaradılacaq yeni zavodun tikintisinə 2014-cü il ərzində başlanılacağı gözlənilir.
N.Əzməmmədov qeyd edib ki, QSC və şirkət nümayəndələri yaxın vaxtlarda görüşəcəklər və əməkdaşlığın təfərrüatları müzakirə olunacaq: "Görüş zamanı, həmçinin tərəflər QSC-nin sərnişin vaqonları alması barədə ətraflı müzakirə aparacaqlar. Həmin vaqonlar Bakı-Tbilisi-Qars yeni dəmiryolu istismara verildikdən sonra istifadə olunacaq".