Azərbaycan, Bakı, 20 oktyabr /Trend, müxbir Maksim Tsurkov/
Azərbaycanın iqtisadi inkişafının perspektivləri və cari proseslərin müzakirəsi üçün oktyabrın 21-də Beynəlxalq Valyuta Fondunun (BVF) ölkə üzrə missiyasının Bakıya səfəri başlayır. Missiyaya fondun Yaxın Şərq və Mərkəzi Asiya Departamentinin müşaviri Raca əl-Mərzuqi rəhbərlik edir.
Bazar ertəsi BVF-nin Bakı ofisinin rəhbəri Aygün Qədirli Trend-ə bildirib ki, səfərdə əsas məqsəd Azərbaycanın iqtisadi inkişafının və onun perspektivlərinin qiymətləndirilməsinin yenilənməsi, eləcə də makroiqtisadi siyasətin müzakirələrinin keçirilməsidir.
Onun sözlərinə görə, səfər çərçivəsində Maliyyə, Vergilər, İqtisadiyyat və Sənaye nazirliklərində, Azərbaycan Mərkəzi Bankında, Dövlət Neft Fondunda, Dövlət Sosial Müdafiə Fondunda, ARDNŞ-də və Azərbaycan Beynəlxalq Bankında görüşlər keçiriləcək.
BVF missiyasının səfəri oktyabrın 27-dək davam edəcək.