Bakı. Hüseyn Vəliyev - Trend:
2050-ci ilədək Azərbaycan əhalisinin sayı 12,1 milyon nəfərə çatacaq. Trend-in məlumatına görə, bunu İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı ADA Universitetində təşkil edilmiş "Kənd təsərrüfatına strateji baxış: rəqabət, ərzaq təhlükəsizliyi və sosial aspektlər" mövzusunda keçirilən konfransda deyib.
Onun sözlərinə görə, həmin dövr ərzində adambaşına düşən kilokalori istehlakının miqdarı gündə 2800-dən 3500-dək artacaq: "Bu o deməkdir ki, 2050-ci ilədək Azərbaycanda ərzaq məhsullarına tələbat 70 faiz artacaq".
V. Qasımlı qeyd edib ki, inkişaf etmiş ölkələrdə kənd təsərrüfatı məhsullarının emal edilmiş hər tonundan 200 dollar əlavə dəyər alırlar: "İnkişaf etməkdə olan ölkələrdə bu göstərici 50 dollar təşkil edir. Emal həcmlərini çoxaltmaqla əlavə dəyəri artıra bilərik ki, bu da rəqabət qabiliyyətinin elementlərindən biridir".