Bakı. Ənvər Məmmədov - Trend:
Azərbaycan Respublikasının Prezidenti yanında Mənzil İnşaatı Dövlət Agentliyi yaxın günlərdə Bakının Yasamal rayonunda güzəştli mənzil kompleksində ticarət mərkəzinin tikintisi üçün investisiya cəlb etməyi planlaşdırır.
Trend-in məlumatına görə, bunu agentliyin direktoru Samir Nuriyev “Daşınmaz əmlak, özəlləşdirmə və investisiyalar” mövzusunda beynəlxalq konfransda çıxışı zamanı deyib.
S.Nuriyevin sözlərinə görə, investisiyaların həcmi 6-7 milyon manat təşkil edəcək. Bununla da Yasamalda mənzil kompleksinin tikintisinə cəlb edilən investisiyanın ümumi həcmi 18 milyon manata bərabər olacaq: “Biz daha əvvəl 11 milyon manat investisiya cəlb etmişdik. Bu məbləğ həm binaların tikintisinə, həm də informasiya-kommunikasiya xətlərinin çəkilişinə sərf ediləcək”.