Bakı Fond Birjasında (BFB) mayın 24-də milli maliyyə bazarının tarixində ilk dəfə olaraq "bank-bank" sxemi üzrə AMB-nın notları ilə banklararası repo əməliyyatı keçirilib. Trend agentliyinin BFB-ya istinadən xəbər verir ki, indiyə qədər repo əməliyyatları Milli Bankın "AMB-bank" və "bank-AMB" sxemilə repo əməliyyatların kontragenti qismində iştirakı ilə keçirilib.
Belə bir əməliyyatın keçirilməsi üçün banklar BFB ilə banklararası repo əməliyyatları üzrə baş saziş imzalamalıdır. Birja qaydaları bazar iştirakçılarına banklararası repo əməliyyatlarını həm milli, həm də xarici valyutalarla həyata keçirməyə imkan verir.
İlk sövdə üzrə kontragentlər qismində Unibank və BankStandard çıxış edib. Sövdə AMB-ın 50102112S dövlət qeydiyyatlı 4 537 notu ilə gerçəkləşdirilib.
Banklararası repo sövdəsinin müddəti 27 gün, faiz dərəcəsi - 10%, banklararası reponun başa çatma tarixi - 2006-cı il iyunun 20-si, AMB-nın notlarının ödəmə tarixi - 2006-cı il iyunun 21-idir.
Bazar iştirakçılarının təşviqi və yeni alətin istifadəsi məqsədilə BFB idarə heyəti həmin əməliyyatlar üzrə komissiya yığımlarını müvəqqəti olaraq toplamamağı qərara alıb.
Həmin alətin tətbiqi fəallığın və qiymətli kağızların ikinci bazarında likvidliyin artırılmasına xidmət edəcək, eləcə də aktivlərin idarə olunmasının səmərəliyini yüksəldəcək.
Trend-in ən mühüm və maraqlı xəbərlərini "Telegram"da izləyin
.jpg)
