2005-ci ilin sonunda Azərbaycanın Dövlət Neft Fondunun təxminən 40% aktivləri qiymətli kağızlara qoyulub

Ernst & Young tərəfindən 31 dekabr 2005-ci il üçün Azərbaycan Dövlət Neft Fondunun maliyyə vəziyyətinə görə hazırlanmış hesabata əsasən, ARDNF-in qiymətli kağızlar üzrə sərmayə portfeli 2 520,278 milyard manat (fondun ümumi aktivlərinin 39,2%-i) təşkil edib.

Trend in hesabata istinadən verdiyi xəbərə görə, 2004 və 2005-ci illərdə maliyyə institutlarının buraxdığı qiymətli kağızlar ən azı Baa3 (Moody's) və ya BBB - (Standard & Poor's) uzunmüddətli kredit reytinqinə malik olublar. 2005-ci ilin sonundakı vəziyyətə görə, onlar Avropa, Asiya və ABŞ maliyyə təşkilatları tərəfindən buraxılıblar. QK 2,25% -7,5% aralığında sabit faiz dərəcəsinə, həmçinin 3 və 6 aylıq ABŞ dolları və Avro liborları üstəgəl 0.05%-2% arasında liborla bağlı dəyişkən faiz dərəcələrinə malikdirlər. Onlar 2006-cı ilin mart ayından 2015-ci ilin iyul ayına qədər tədavül müddətinə malikdirlər. Bu qiymətli kağızlar 2004-cü ildə Avropa, Avstraliya, Şimali və Latın Amerikası maliyyə təşkilatları tərəfindən buraxılıb. Onlar 2.25%- 8% arasında sabit faiz dərəcəsinə malik olub, dəyişkən faiz dərəcəsi isə 2005-ci ildə olduğu səviyyədə olub. Onların tədavül müddəti 2005-ci ilin dekabr ayından 2014-cü ilə qədərdir.

ARDNF tərəfindən 2005-ci ildə agentliklərə qoyulmuş sərmayələr ABŞ agentliklərindən Fannie Mae, Freddie Mac, Federal Home Loan Bank, Federal Farm Credit Bank və digər ölkələrin agentliklərinin qiymətli kağızları ilə, 2004-cü ildə isə yalnız Fannie Mae, Freddie Mac,Federal Home Loan Bank agentliklərinin qiymətli kağızları ilə həyata keçirilib. Ötən il sabit faiz dərəcəsi 1,75%- 6,20% arasında (2004-cü ildə - 1,75%-4,625%) müəyyən olunub. Onların tədavül müddəti 2006-cı ilin mart ayından 2013-cü ilin mart ayınadəkdir (2005-ci ilin dekabrından 2013-cü ilin may ayına qədər).

Xarici ölkələrin qiymətli kağızlarına qoyulan sərmayələr Şərqi Avropa, Asiya, Afrika və Cənubi Amerika ölkələrinin qiymətləri kağızları ilə, 2004-cü ildə isə ABŞ, həmçinin Şərqi Avropa və Asiya ölkələri xəzinələrinin istiqrazları ilə həyata keçirilib. Sabit faiz dərəcəsi 3%-10% səviyyəsində (2004-cü ildə - 1,75%-8,75%) və 3 və 6 aylıq ABŞ dolları və Avro liborları üstəgəl 0,03%-0,8125% arasında libor dəyişkən faiz dərəcəsinə malik olub. Onların tədavül müddəti 2006- cı ilin may ayından 2010-cu ilin iyul ayına qədərdir (may 2005-aprel 2011).